Manhajka webkan iyo sees dhigiisu waxaan kusoo koobeynaa ereyadan :-
1- Meesha aanu kasoo qaadaneyno diinta iyo tacliinteenu waa inta waafaqsan Kitaabka Allaah iyo Sunnada Rasuulka (Sallallaahu caleyhi wassalam), intaa waxa soo raaca waa Ijmaacada ummadan ee salafkoodii saalixa ahaa, waxaanu iska tureynaa wixii ka hor imanaya ama garab socda ee kasoo hor jeeda fahankaas iyo dariiqaasi.
2- Cid laga hor marin karaa ma jirto Kitaabka iyo Sunnada, ciddey doonto ha ahaatee, qiimaha iyo intuu doono ha weynaado qofkaasi.
3- Qolku wuxuu u raacayaa arrintaa soo gudbinta iyo fududeynta Duruustii loo mari lahaa, Duruustaas oo sahleysa kana soo burqaneysa fahanka salafkaasi Suuban.
4- Inaan dadka u soo ban-dhigno dariiqa loo mari karo Cilmigaasi iyo weyneynta Culumada.
5- Weyneynta iyo kor u qaadida dadkii kor u qaadey Kitaabka iyo Sunnada Rasuulka (scw) ku dayashadooda iyo daba galkoodu ayaa ah dariiqa badbaadaada.
6- Siduu Allaah inooga dhigey ummada dhexe oo dhexdhexaada aynu u dhaxaynaa dadka ku talax tagey ama ka gaabiyey fahanka iyo ku dhaqanka Diinta islaamka.
7- Waxaanu si cad oo caad ku jirin uuga bari nahay, dhammaan fahanka ka soo hor jeeda ahlusunah waljamaacah, inta bidcada iyo khuraafaadka diinta ku soo dartay, sidoo kalana kuwa aan raacin manhajkaasi badbaadada ee Salafka.
8- Xagga kalana waxaanu ka fog-nahay isku adkeynta iyo fahanka cidhiidhiga ah ee dadka kala fogeynaya ama diinta sidey u arkaan uu ku miisaamaya dadka iyo Ducaada.
9- Webkan looguma baaqi karo ama dadka looguma yeedhi karo khilaafka, kala tagga iyo dagaalada aan Culumada raasikhiinta ah ka soo fulin ee hareeraha laga alifayo.
10- Muslimiinta oo loo gargaaro, hadal iyo hugunba, hiil iyo hooba, waa dariiqa muslimiinta, hammigooda iyo warwarkoodana lala qaybsado, oo aan bustaha hoosta laga huwan, balse hadal iyo iclaamba in lagu difaaco intii la awoodo.
11- U Nasteexaynta Muslimiinta iyo Usuulka Nasiixada –xaakim iyo maxkuumba- waa dariiqa lagu badbaadayo, taas oo aan cidna looga baqan xaqa in loo caddeeyo.
12- Is caawinta Muslimiinta dhexdooda, wada shaqeyntooda iyo isku duubnidoodu waa dariiqa looga hor tagi karo cadawgooda, ahna dariiqa loogu gargaari karo diinta Allaah, kala tagga iyo firqooyinka kooxiba meel isku xidhateyna waa dariiqa jajabinta iyo kala tagga ee u horseedeysa ummada burburka iyo guul-darrada.
13- Muwaalaatka –xidhiidhinta iyo soo dhaweynta waxa isku leh Muslimiinta, goynta iyo la colleytankana gaalada iyo wixii cago ku qaato. Dadka Muslimiinta ah waxaan soo dhaweyneynaa intey Allaah u dhow yihiin, waxaana loo goynayaa intey Manhajka asleynka ka fog yihiin.
14- Jamaacaad, xizbiyo iyo fikrado kala duwanaadey ama culumada oo arrin isku khilaafey ama kala jecleysi iyo dad badsi layskumana goynayo layskumana colaadinayo.
15- Mahajka Salafku ma aha mid dad gaari gooni u leeyihiin, waase dariiq cad oo dadkoo dhan u dhexeeya inta raacdey ee u abtirsaneysa ayaanu la jirnaa, inta colaadineysa ama cilladeyneysana waanu khilaafsan nahay, dadkana uma qaybineyno bidaaqad cas iyo buluug ee Allaah ayaa kala xisaabtamaya qof kastaaba wuxuu sameeyey, waxa ina saarina waa dacwad iyo gaadhsiin dariiqa saxda ah raacitaankiisa iyo caddeyntiisa, xukunkooda iyo gaaleysiintooduse laynama saarin.
16- Haddii arrin laysku qabto-sida qodobka 1aad tilmaamey-waxaanu isla noqoneynaa Kitaabka iyo sunnada, kadibna fahanka salafka, haddii ay ku kala duwan yihiinna inta daliilka u dhaw, haddii ay isku martabad yihiin, martabadda ijtihaadkana gaadheen waxaan qaadeynaa dariiqa tarjiixa ee culumada ku bayaamiyeen usuusha.
17- Xamaasad iyo kacdoon aan meel gaadhsiisneyn kuma gaadheyno yoolka aan higsaneyno, waxase loo baahan yahay inaan mar kasta ka ag dhawaano culumadeena kuwaas oo ayaguna u sii dhawaanaya inta kasii cilmi iyo fahan saraysa, halkaas oo silsiladda is maqalka iyo islaaxu ku hir gali karto.
18- Ugu danbeyn: manhajku, ma aha , mid qof loo tiirin karo, dejintiisa iyo qoridiisaba, waana ballaadhan yahay , muggiisuna waa weyn yahay, qof laysku duro, ama jamaaco laysku imtaxaanana wuu ka sarreeyaa, wuxuuna u baahan yahay soo dhiraandhirin iyo hoos u dhaadhac culuumta waxyiga laga shidaal qaato.

Allaah hanaga dhigo kuwo ku dhaqma waxay sheeganayaan, hanoona dhaafo gafafka iyo turunturooyinka, isagaa ceeb astura ah, danbi dhaafkiisana aaney cidi hor joogansan karine, haynagu hanuuniyo tubta toosan iyo talada teeda saxan. Aamiin

Fadlan, khaasatan culumada, haddii ay jiraan qallooc ku yimid tilmaamidda manhajka, hanoo soo tabiyaan si aanu uga saxno meesha qaloocu kaga jiro.


Wabbillaahi Tawfiiq.